بەمەبەستی بەرزکردنەوەی توانای توێژەران و سەرخستنی پڕۆژەی ئەزموونیی هاوکاریکردنی خێزانە هەژار و کەمدەرامەتەکان (PMT Pilot)، خولێکی ڕاهێنانی تایبەت بۆ توێژەرانی کۆمەڵایەتی لە شاری دهۆک بەڕێوەچوو.

خولەکە لە ماوەی نێوان ١٠ تا ١٤ی ئایاری ٢٠٢٦ بەردەوام بوو، کە تێیدا زیاتر لە ٧٥ توێژەری کۆمەڵایەتی ڕاهێنانیان پێدرا لەسەر شێوازەکانی کۆکردنەوەی داتا بۆ ئەو خێزانانەی کە شایستەی هاوکارین لە سنووری ناوەندی شاری دهۆک.

ئەم خولە لەلایەن فەرمانبەرانی پسپۆڕی "دەستەی ئاماری هەرێم"ـەوە بەڕێوەچوو، کە بە هاوبەشی و هەماهەنگی لەگەڵ "وەزارەتی کار و کاروباری کۆمەڵایەتی"ی حکومەتی هەرێمی کوردستان ڕێکخرابوو. جێی ئاماژەیە، پڕۆژەکە بە پاڵپشتی و پشتیوانیی داراییی "بانکی نێودەوڵەتی" (World Bank) جێبەجێ دەکرێت، کە ئامانجی سەرەکیی کەمکردنەوەی ڕێژەی هەژاری و گەیاندنی هاوکارییە بەو چین و توێژانەی بژێوی ژیانیان لەژێر هێڵی هەژارییە، بەمەبەستی دەربازکردنیان لە بازنەی هەژاری.

لە ماوەی پێنج ڕۆژی خولەکەدا، بەشداربووان ئاشناکران بە نوێترین تەکنەلۆژیا و فۆرمە ئەلیکترۆنییەکان بۆ تۆمارکردنی زانیارییەکان، تاوەکو پڕۆسەی هاوکاریکردنەکە بە شێوەیەکی دادپەروەرانە و زانستی بگاتە دەستی خێزانە هەژار و کەمدەرامەتەکان.

ئەم هەنگاوە لە چوارچێوەی زنجیرە پڕۆژەکانی حکومەتی هەرێمی کوردستان و ڕێکخراوە نێودەوڵەتییەکانە بۆ باشترکردنی دۆخی گوزەرانی هاووڵاتیان. پڕۆژەکە وەک سەرەتایەک بە شێوەیەکی ئەزموونی لە سەنتەری شاری دهۆک دەستی پێکردووە و بڕیار وایە لە داهاتوودا، دوای دابینکردنی بودجەی پێویست، بە شێوەیەکی فراوانتر گشت پارێزگاکانی تری هەرێمی کوردستان بگرێتەوە.